Երևանում մեկնարկեց "Ազգային հարստություն" դասընթացաշարի չորրորդ փուլը


Այսօր`Հոկտեմբերի 13-ին, ժամը 15:00-ին կայացավ «Ազգային հարստություն» դասընթացաշարի չորրորդ փուլի բացման արարողությունը: Ծրագրի նպատակն է բարձրացնել հայկական մշակույթի և պատմության իմացությունը, ազգային ինքնության ճանաչումը և սերմանել ազգասիրություն հասարակության մեջ: Դասընթացի բացմանը ողջույնի խոսքով հանդես եկան «Զարգացում» հասարակական շարժման նախագահ Վահան Եղիազարյանը, Ճարտարապետության ազգային թանգարան-ինստիտուտի գիտքարտուղար Անի Գրիգորյանը: 
Իր խոսքում  «Զարգացում» հասարակական շարժման նախագահ ՎահանԵղիազարյանը նշեց.
- Հայաստանի ամենակարևոր ռեսուրսը և հարստությունը Հայ երիտասարդն է, և նրա հայրենանվեր գործն է դարձնելու մեր երկիրը առաջադեմ և բարեկեցիկ: Երկիր, ուր ավելի շատ ներգաղթողներ կլինեն, քան արտագաղթողներ: Երկիր, որով բոլորս կհպարտանանք: Երկիր, որը կլինի իրական ազգային հարստություն:
Ճարտարապետության ազգային թանգարան-ինստիտուտի գիտքարտուղար Անի Գրիգորյանը ողջունեց մասնակիցներին` մաղթելով հետաքրքիր  և օգտակար բանախոսություններ, իսկ նմանատիպ հայրենանվեր ծրագրերին` շարունակականություն: Նա հույս հայտնեց, որ առաջիկայում երիտասարդությունը ակտիվ ներգրավվածություն կցուցաբերի հայ արվեստի և մշակույթի ոլորտում:
«Զարգացում» հասարակական շարժման Հայրենասիրական ծրագրերի բաժնի ղեկավար Արմինե Բադալյանը նշեց, որ ազգային մշակույթի և պատմության ծանոթացումը շարժման նպատակներից է, որը պետք է նպաստի երիտասարդության շրջանակներում հայրենասիրության զարգացմանը:
Բացմանը ավանդական հայկական պարերով հանդես եկավ «Կարին» ավանդական երգի-պարի համույթի ճյուղերից «Մենք» ավանդական պարի խումբը:
Պաշտոնական բացումից անմիջապես հետո տեղի ունեցավ առաջին բանախոսությունը՝ «Ինչպես վերականգնել հայկական ավանդական հագուստը (տարազ) և ինչպես այն դարձնել նորաձև», որը ներկայացրեց է Տերյան մշակութային կենտրոնի գործադիր տնօրեն Լիլիթ Մելիքյանը:
Դասընթացաշարի այս փուլը կազմված է 8 բանախոսություններից և կշարունակվի Երևանում մինչ հոկտեմբերի 29-ը:

«Զարգացում» հասարակական շարժումը ստեղծվել է 2013 թվականին: Շարժումը միավորում է Հայաստանի առաջադեմ երիտասարդությանը և իր առաքելությունն է համարում հայրենասիության, միասնության և տնտեսության զարգացումը: Շարժմանը կարող են անդամակցել ինչպես անհատներ, այնպես էլ հասարակական կազմակերպություններ, որոնք կիսում են Հայաստանի զարգացման շարժման տեսլականը: